RUNGWE KUJENGWA SOKO LA KIMATAIFA LA NDIZI

Soko la kimataifa la zao la ndizi linatarajiwa kujengwa wilayani Rungwe mkoani Mbeya lengo likiwa ni kuongeza kipato kwa wakulima wa zao hilo na kuimua uchumi wa wilaya, mkoa na Taifa kwa ujumla.

Hayo yamesemwa na mkuu wa mkoa wa Mbeya Bw. Amosi Makala wakati wa ufunguzi wa kongamano la kutangaza fursa za uwekezaji mkoani mbeya lililofanyika jijini Mbeya na kuhudhuriwa na viongozi na wadau mbalimbali wa maendeleo kutoka ndani na nje ya mkoa pamoja na naibu Spika wa Bunge Dk. Tulia Acson Mwansasu.

Aidha mkuu wa mkoa ameelezea fursa mbalimbali zinazopatikana katika wilaya ya Rungwe na kuongeza kuwa viwanda vinavyotengeneza vinywaji vinategemea gesi inayozalishwa katika halmashauri ya Busokelo na Rungwe hivyo kuwataka wawekezaji kuendelea kuzitumia fursa hizo kwa manufaa ya wananchi.

Kuhusu suala la uzalishaji wa Maziwa katika mkoa wa Mbeya Mkuu wa Mkoa amezitaka wilaya zinazofuga Ng'ombe kwa wingi kuiga mfano bora wa ufugaji wa ng'ombe wa maziwa kutoka Rungwe huku akiwataka wawekezaji kuwekeza viwanda vya kusindika Nyama na Ngozi  katika wilaya ya Chunya ili waweze kufuga kisasa zaidi.

Katika kongamano hilo Makalla ameainisha fursa mbalimbali za uwekezaji katika mkoa wa Mbeya na wilaya zake ikiwa ni pamoja na uwepo wa madini, kilimo na ufugaji, na Vivutio vya utalii ambapo wilaya ya Rungwe inavivutio vingi zaidi ukilinganisha na wilaya nyingine.